दमास्कस– रुसी सहयोगमा सिरियाली फौजले पछिल्लो दुई महिनायता विद्रोहीविरुद्ध गरेको सैनिक कारवाहीमा हालसम्म ५ सयभन्दा धेरै सर्वसाधारणको ज्यान गएको प्रतिवेदन सार्वजनिक भएको छ ।

सिरियाली मानव अधिकार सञ्जाल नामक संस्थाले सार्वजनिक गरेको प्रतिवेदनअनुसार विद्रोहीविरुद्ध रुसी सहयोगमा सिरियाली सेनाले गरेको कारवाहीमा अरु २ हजारभन्दा धेरै सर्वसाधारण घाइते भएको जनाइएको छ ।

इडलिब प्रान्त तथा त्यस आसपास रहेको विद्रोही गढमा गरिएको सैनिक कारवाहीमा ५४४ सर्वसाधारण मारिएको जनाइएको छ । मारिनेमध्ये १३० बालबालिका छन् । त्यस्तै, सैनिक कारवाहीमा अरु २११७ सर्वसाधारण घाइते भएका छन् ।

उक्त संस्थाले सिरियाली सेनाले जानाजान सर्वसाधारणलाई लक्षित गरी आक्रमण गरेको आरोप समेत लगाएको छ । विद्रोहीविरुद्ध रुसी वायुसेनाको सहयोगमा सिरियाली सेनाले गत अप्रिल २६ यता सैनिक कारवाही गर्दै आएको छ ।