काठमाडौं– त्रिभुवन अन्तर्राष्ट्रिय विमानस्थलमा नवनिर्मित हवाई जहाज पार्किङ स्थल सञ्चालनमा आएको छ ।

बिहीबार पर्यटन मन्त्रालयका सचिव मोहनकृष्ण सापकोटाले पार्किङ स्थलको सुभारम्भ गरेका हुन् । अन्तर्राष्ट्रिय विमानस्थलमा पार्किङ क्षेत्रको अभाव भएका कारण जहाजहरु ल्याण्ड हुन नसकेर आकासमा नै होल्ड हुने अवस्था थियो ।

उद्घाटन कार्यक्रमलाई सम्बोधन गर्दै विमानस्थलका प्रमुख राजकुमार क्षेत्रीले नयाँ बनेको पार्किङले आकाशमा विमान होल्ड हुने समस्या अन्त्य हुने दाबी गरे ।

उक्त पार्किङ स्थल टुन्डी–लामा समानान्तर जेभी निर्माण कम्पनी र ए वान विल्डर्स कम्पनीले चार वर्ष लगाएर बनाएको हो । यसको कुल लागत ४४ करोड ५० लाख ४३ हजार सात सय २८ रहेको निर्माण कम्पनीले जनाएको छ ।