काठमाडौं – प्रदेश नम्बर २ ले मनमोहन मेमोरियल अन्तर प्रदेश यु–१६ राष्ट्रिय क्रिकेट प्रतियोगिताको उपाधि जितेको छ ।

मंगलबार किर्तिपुरस्थित त्रिवि क्रिकेट मैदानमा भएको खेलमा प्रदेश २ ले सुदुरपश्चिम प्रदेशलाई ४ विकेटले पराजित गर्दै उपाधि उचालेको हो ।

टस जितेर पहिले ब्याटिङ गरेको सुदुरपश्चिमले दिएको १ सय ३४ रनको लक्ष्य प्रदेश २ ले २६ ओभर ३ बलमा ६ विकेट गुमाएर पुरा गर्यो । प्रदेश २ का लागि रोहन बिकले सर्वाधिक ३६ रनको पाली खेल्दा बिशाल पटेलले अविजित २८ तथा निखिल सिंहले २७ रन बनाए । प्रदेश २ विरुद्ध प्रदेश ७ का आशिष भट्टले ३ र गोबिन्द बिष्टले १ विकेट लिए ।

यसअघि पहिलो ब्याटिङ गरेको प्रदेश ७ ले पुरा खेल खेल्दै ९ विकेट गुमाएर १ सय ३३ बनायो । सुदुरपश्चिमका लागि सुवाश ऐरले सर्वाधिक ४७ रन बनाएका थिए । यस्तै सन्दीप बिष्टले २८ र आशिष भट्टले २१ रन बनाएका थिए ।

प्रदेश २ का बिशाल पटेल र निखिल सिंहले समान ३–३ विकेट लिएका थिए । उपाधिसंगै प्रदेश नम्बर २ ले २ लाख ५० हजार रुपैयाँ र सोही रकम बराबरको खेल सामग्री प्राप्त गर्दा उपविजेता सुदुरपश्चिमले १ लाख ५० हजार रुपैयाँ र सोही बराबरको खेल सामग्री प्राप्त गरेको छ ।