म्याग्दी– म्याग्दीको बेनी नगरपालिका–२ ज्यामरुककोटको गौश्वाराका बासिन्दाले ३ दिनसम्म श्रमदान गरेर गाउँमा पुग्ने मोटरबाटोको स्तरोन्नति गरेका छन् ।

भकुण्डे–तमाने–गौश्वारा जोड्ने मोटरबाटोको ४० मिटर क्षेत्रमा स्थानीयवासी मिलेर ढुङ्गा बिच्छ्याउने काम (सोलिङ) गरेका हुन् ।

“आफूले गर्न सक्ने र गरे हुने” कामका लागि सरकारी बजेटको मात्र आशा गर्नु हुँदैन भन्ने सन्देश प्रवाह गर्न गाउँलेले स्वतःस्फूर्तरूपमा श्रमदान गरेका अगुवा डम्मर सापकोटाले जानकारी दिए ।

सापकोटाका अनुसार गौश्वाराका बासिन्दाले मोटरबाटोको सोलिङका लागि ३ दिनसम्म ढुङ्गा फोर्ने, बोक्ने र बिच्छ्याउने काम गरेका हुन् ।

बर्खामा हिलाम्य र हिउँदमा धुलाम्य हुने उक्त मोटरबाटोको सोलिङ गरेको क्षेत्रमा अब राम्रोसँग यातायातका साधन सञ्चालन हुनसक्ने भएको छ ।