जम्मु– भारत प्रशासित कश्मीरको पुलावामामा ४० जनाभन्दा धेरै भारतीय अर्धसैनिकको ज्यान जानेगरी भएको आत्मघाती बम आक्रमणको तीन साता पछि जम्मु शहरमा अर्को विष्फोट भएको छ ।

जम्मुको मुख्य बस बिसौनीमा मध्याह्न १२ बजे मानिसहरुको भीड रहेका बेला ग्रिनेड विष्फोट भएको अधिकारीले जनाएका छन् ।

विष्फोटनमा २६ जना घाइते भएको भारतीय अखबार हिन्दुस्तान टाइम्सको अनलाइन संस्करणले लेखेको छ ।

विष्फोटनमा घाइतेमध्ये चार जनाको अवस्था गम्भीर रहेको बताइएको छ । घइते हुनेमध्ये ११ जना कश्मीरका, ८ जना जम्मुका तथा बाँकी ६ जना भारतका अन्य राज्यका मानिसहरु छन् ।

घाइते हुनेमा बसचालक, सहचालकहरु तथा बस कुरेर बसिरहेका यात्रुहरु रहेको भारतीय सञ्चारमाध्यमले जनाएका छन् ।

प्रहरी अधिकारीका अनुसार बसमा लुकाइएको ग्रिनेड विष्फोट भएको हो । विष्फोट शक्तिशाली रहेकाले नजिकै रहेका बसका शिसा पनि फुटेका छन् ।

पछिल्लो १० महिनामा जम्मुमा भएको यो तेश्रो गिनेड आक्रमण हो । जम्मु भारतको जम्मु–कश्मीर राज्यको शीतकालीन राजधानी हो ।