काठमाडौं– गण्डकी मेडिकल कलेजका सीइओ लक्ष्मण शर्मा र परीक्षा नियन्त्रक सन्तोष खनाल पक्राउ परेका छन् । जिल्ला अदालत कास्कीको आदेशमा जिल्ला प्रहरी कार्यलयको टोलीले उनीहरुलाई बुधबार पक्राउ गरेको हो ।

विद्यार्थीहरुले भर्नामा सरकारले तोकेको भन्दा बढी शूल्क कलेजले लिएको भन्दै मंगलबार प्रहरीमा ठगी आरोपमा उजुरी दिएका दिए । विद्यार्थीहरुले ठगीकै आरोपमा कलेज संचालकको सम्पति छानविन गर्न माग गर्दै मंगलबार सुद्दीकरण विभागमा समेत उजुरी दिएका थिए ।

सरकारले तोकेभन्दा बढी रकम असुलेको भन्दै उजुरी परेपछि जिप्रकाले बुधबार नै कलेजका सञ्चालक खुमा अर्यालसहित १० जनाविरुद्ध पक्राउ पुर्जी जारी गरेको थियो । सरकारले उपत्यकाबाहिरका मेडिकल कलेजहरुमा एमबिबिएसको शुल्क ४२ लाख रुपैयाँ तोकेको भएपनि कलेजले विद्यार्थीबाट थप १५ लाखसम्म रकम असुलेको विद्यार्थीको आरोप छ ।

अतिरिक्त शुल्क फिर्ता गर्नुपर्ने, शुल्क तिरेपछि बिल तथा भौचर दिनुपर्ने लगायतका चारबुँदे माग राखेर विद्यार्थीहरू फागुन १ गतेबाट चरणवद्ध  आन्दोलनमा छन् ।