काठमाडौं– त्रिवि चिकित्सा शास्त्र अध्ययन संस्थान (आइओएम)मा नयाँ भर्नाका लागि भोलि ( शनिवार) हुन लागेको प्रवेश परीक्षा स्थगित गर्न सर्वोच्च अदालतले अन्तरिम आदेश दिएको छ ।

न्यायाधीश तेज बहादुर केसीको एकल इजलासले भोलि हुने आइओएमको परीक्षा स्थगित गर्न अन्तरिम आदेश जारी गरेको हो ।

चिकित्सा शिक्षा ऐन विपरित आइओएममा परीक्षा हुन लागेको भन्दै आयुष ओझाले सर्वोच्चमा रिट हालेका थिए ।

उनको रिटमा चिकित्सा शिक्षा ऐन मा भएको प्रवाधान र अहिले विभिन्न सरकारी चिकसत्सा शिक्षण संस्थाबाट निकालिएको विज्ञापनको छलफल गर्नुपर्ने देखिएको भन्दै सर्वोच्चले आइओएमको परीक्षा रद्ध गर्न अन्तरिम आदेश दिएको हो ।

आइओएममा नयाँ भर्नाका लागि एमवीवीएस तहको प्रवेश परीक्षा भोलि सञ्चालन गर्ने तय गरेको थियो । तर सर्वोच्चले परीक्षा तत्काल रद्ध गरी २५ गते दुइपक्षलाई छलफलका लागी बोलाएको छ ।

चिकित्सा शिक्षा ऐनमा मेडिकल विद्यार्थीलाई ७५ प्रतिशत छात्रवृत्तिको व्यवस्था गरिएको भएपनि ऐन कार्यन्वयन नभएको भन्दै मेडिकल शिक्षा अध्ययनरत विद्यार्थीहरुले समेत विरोध गर्दै आएका छन् ।