काठमाडौं– फिफा विश्वकप २०२२ तथा एसिया कप २०२३ छनोटको पहिलो खेलमा पराजित भएको नेपाली राष्ट्रिय फुटबल टोली शनिबार नेपाल हुँदै ताइवान जाने भएको छ ।

विश्वकप छनोटको एसिया समूह ‘बी’मा रहेको नेपाल बिहीबार राति कुवेतसँग ७–० को फराकिलो गोल अन्तरले पराजित भएको थियो ।

पहिलो खेलमा पराजय व्यहोरेको नेपाली टोली शनिबार बिहान नेपाललाई ट्रान्जीट बनाएर आउनेछ भने बेलुका ताइवानका लागि उड्ने छ ।

नेपालले भदौ २४ गते छनोटको दोस्रो ‘अवे’ खेलअन्तर्गत चाइनिज ताइपेइसँग प्रतिस्पर्धा गर्दैछ ।

छनोटमा कमजोर शुरुवात गरेको नेपाल दोस्रो खेलमा पुनरागमनको लक्ष्यमा रहने छ । कुवेतविरुद्धको खेलमा हार व्येहोरेको नेपालका मुख्य प्रशिक्षक योहान कालिनले पराजयको कारण खोज्ने बताइसकेका छन् ।

नेपाली टोलीले गएको जुन महिनामा ताइपेइसँग एक खेलको मैत्रिपूर्ण खेल खेलेको थियो । उक्त खेल नेपालले १–१ बराबरी खेलेको थियो ।