जर्मनी– जर्मनीमा ८५ जान बिरामीलाई ज्यानमारा औषधी प्रयोग गराइएको अभियोगमा दोषी पाइएका एक नर्सलाई अदालतले जन्मकैदको फैसला सुनाएको छ ।

बिरामीलाई ज्यानमारा औषधी दिने नर्स निएल्स होइगेललाई जर्मनीको ओल्डेनबर्ग शहरको जिल्ला अदालतले जन्मकैदको फैसला सुनाएको हो ।  उनले बिरामीलाई प्राणघातक औषधि सेवन गराएर पुनः वीरतापूर्वक बचाउने प्रयत्न गर्दा बिरामीको मृत्यु भएपछि हत्या गरेको भन्दै दोषी ठहर गिरएको हो ।

सन् २००० देखि २००५ सम्म नर्स होइगेलले १ सय बिरामीको हत्या गरेको अभियोग लागेको थियो । उनले शुरुमा आफूले ४३ जना बिमारीको हत्या गरेको स्वीकार गरी बिरामीका परिवारसँग माफी मागेका थिए ।

तर, अभियोजनकर्ताले भने उनले १०० बिमारीकै हत्या गरेको भनी अदालतमा अभियोग दर्ता गराएका थिए । उनलाई १ सय मध्ये ८५ अभियोगमा दोषी ठहर गरी आजीवन कारावासको सजाय सुनाइएको अन्तर्राष्ट्रिय सञ्चारमाध्यमले जनाएका छन् ।

उनलाई यसअघि सन् २०१५ मा दुई हत्या अभियोगमा दोषी ठहर भई हाल सजाय काटिरहेका छन् । उनमा मनोवैज्ञानिक समस्या भएको हुनसक्ने जर्मन सञ्चारमाध्यमले जनाएका छन् ।