काठमाडौं– सुन तस्करहरुले पछिल्लो समय सरकारी स्वामित्वको नेपाल वायु सेवा निगम (नेपाल एयरलाइन्स)कै विमानबाट सुन तस्करी गर्ने गरेको खुलेको छ ।

तस्कहरुले वैदेशिक रोजगारीबाट नेपाल फर्किने तथा अन्य यात्रुको प्रयोग गरेर नेपाल एयरलाइन्समार्फत सुन तस्करी गर्ने गरेको खुलेको हो ।

नेपाल एयरलाइन्सका एकजना कर्मचारी तस्करी गरेर ल्याइएको ३० तोला सुनसहित पक्राउ परेपछि यस्तो सुन तस्करीको रहस्य खुलेको हो ।

महानगरीय प्रहरी परिसर काठमाडौंबाट खटिएको टोलीले ३० तोला सुनसहित त्रिभवन अन्तराष्ट्रिय विमानस्थलबाट नेपाल एयरलाईन्सका मेन्टिनेन्स ह्यांगरमा कार्यरत कर्मचारी रञ्जितकुमार यादवलाई नियन्त्रणमा लिएको थियो । यादवमाथि प्रारम्भिक छानबिन पछि तस्करहरुले नेपाल एयरलाइन्समा यात्रा गर्ने यात्रुको प्रयोग गरेर सुन तस्करी गर्ने गरेको खुलेको हो ।

यात्रुले ल्याएको तस्करीको सुन रञ्जितले बुझ्दै आएका थिए । आइतबार कतारको दोहाबाट आएको नेपाल एयरलाइन्सको फ्लाइटका यात्रु सिरहाका धर्मेन्द्रकुमार यादवले सुन रञ्जितले बुझेका थिए ।

महानगरीय प्रहरी परिसर काठमाडौंका प्रमुख प्रहरी वरिष्ठ उपरीक्षक (एसएसपी) बसन्तकुमार लामाले नेपाल एयरलाइन्सको विमानमार्फत यसअघि पनि सुन तस्करी हुने गरेको देखिएको बताए । ‘यसअघि पनि नेपाल एयरलाइन्सको विमानबाट सुन तस्करी हुने गरेको देखिएको छ,’ एसएसपी लामाले भने, ‘यात्रुमार्फत तस्करी हुने सुन काठमाडौं पुगेपछि रञ्जितले बुझ्ने गरेको भेटिएको छ ।’

यद्यपि यस विषयमा थप अनुसन्धान भइरहेको एसएसपी लामाको भनाइ छ ।