एजेन्सी– पछिल्लो समय इजरायल र इजरायल अधिनस्थ गाजा क्षेत्रमा जारी द्वन्द्व बढ्दै गएपछि इजरायल र गाजा क्षेत्रमा सक्रिय इस्लामिक समूह हमासबीच युद्धविराम भएको छ ।

गाजाको प्रशासन सम्हाल्दै आएको हमाससँग आबद्ध टेलिभिजनले इजिप्टको मध्यस्थतामा युद्धविराम भएको जनाएको हो ।

प्यालेष्टाइनी पक्षका अनुसार सोमबार सबेरै साढे ४ बजे इजरायल र हमासबीच हिंसा स्थगित गर्ने सम्झौता भएको हो । यस विषयमा इजरायली पक्षबाट भने केही विवरण सार्वजनिक भएको छैन ।

इजरायली र प्यालेष्टाइनी दुबै पक्ष हिंसालाई चर्काउने पक्षमा नरहेकाले युद्धविराम भएको बताइएको छ ।

तीन दिनअघि हमास र इजरायलबीच हिंसा शुरु भएको थियो । आइतबारमात्रै हमासले इजरायलमा ६ सय भन्दा धेरै रकेट आक्रमण गरेको थियो ।

केही रकेट बीच आकाशमै इजरायलको आइरन डोम नामक रकेट प्रतिरोधी प्रणालीले राकेपनि केही रकेटले जमिनमा आक्रमण गर्न सफल भएको र रकेट आक्रमणबाट ४ जना इजरायलीको ज्यान गएको अन्तर्राष्ट्रिय सञ्चारमाध्यमले जनाएका छन् ।

रकेट आक्रमणपछि इजरायलले गाजा क्षेत्र गरेको सैनिक तथा हवाई आक्रमणमा सर्वसाधारण नागरिकसहित १९ जनाको ज्यान गएको थियो ।