भारत– भारत उत्तर प्रदेशका २० लाखभन्दा धेरै कर्मचारी आन्दोलनमा उत्रेका छन् । सरकारले पेन्सन कटौती गर्ने योजनाको विरोध गर्दै विभिन्न कर्मचारी युनियनको नेतृत्वमा कर्मचारी आन्दोलनमा उत्रेका हुन् ।

सरकार र विभिन्न कर्मचारी युनियनबीच भएको वार्ता असफल भएपछि कर्मचारी आन्दोलित भएका हुन् । आन्दोलनमा करिब १ सय ५० कर्मचारी युनियनको सहभागीता छ ।

आन्दोलित कर्मचारीले राज्यको राजधानी लखनउसहित विभिन्न शहरमा प्रदर्शन गरेको बताइएको छ । प्रदर्शनकारी कर्मचारीका केही नेताहरुलाई गिरफ्तार गरिएको अधिकारीले जनाएका छन् ।

यता आन्दोलनकारीले भने आगामी फेब्रुअरीको १२ सम्म आन्दोलन गर्ने तर, त्यसपछि पनि माग पूरा नभएमा थप आन्दोलन गर्ने चेतावनी समेत दिएका छन् ।

फेब्रुअरी १२ सम्म सरकारलाई आफ्नो माग पूरा गर्न अल्टिमेटम दिएको र त्यसपछि पनि आफ्ना माग पुरा नभएमा स्वास्थ्य तथा अत्यावश्यकबाहेक सबै कामकाज ठप्प पार्ने कर्मचारी युनियनको चेतावनी छ ।

भारतमा चुनाव नजिकिँदै गर्दा कर्मचारीको यो आन्दोलनले सत्तारुढ भारतीय जनता पार्टी बिजेपीको गढ मानिने उत्तर प्रदेशमा बिजेपीलाई अफ्ठ्यारो पर्नसक्ने आँकलन गरिएको छ ।