काठमाडौं– नेपालका लागि फ्रान्सेली राजदूत फ्रंस्वा जाविए लेजेले खबरहबकर्मी थानेश्वर गुरागाईंलाई ४ छुट्टा छुट्टै कीर्तिमानसँग सम्बन्धित गिनिज वर्ल्ड रेकर्डको प्रमाण पत्र हस्तान्तरण गरेका छन् ।

खबरहबका विशेष संवाददाता गुरागाईंले गत साउनमा पेरिसस्थित आइफिल टावर अगाडि ४ वटा विश्व कीर्तिमान बनाएका थिए ।

गुरागाईंले यसअघि आफ्नै नाममा गिनिज बुक अफ वल्ड रेकर्ड्समा कायम भएका ३ कीर्तिमान तोड्दै थप एकसहित ४ कीर्तिमान कायम गरेका थिए ।

गुरागाईंले लामो समयसम्म कुहिनामा बास्केटबल घुमाएर आफ्नै कीर्तिमान तोडेका थिए । यसअघि ११ सेकेण्डसम्म कुहिनामा बास्केटल घुमाएकोमा गत साउनमा उनले १३ दशमलब ९४ सकेण्डसम्म घुमाउँदै आफ्नै कीर्तिमान तोडेका थिए ।

गुरागाईंले एक मिनेटमा १५ पटक २८ सेन्टिमिटर परिधी भएको धातुको रिङ टाउकोबाट छिराएर खुट्टाबाट निकालेर दोस्रो कीर्तिमान राखेका थिए । अघिल्लो कीर्तिमानमा उनले १० पटक उक्त परिधीको धातुको रिङ टाउकोबाट छिराएर खुट्टाबाट निकाले थिए ।

यसैगरी, लामो समयसम्म टाउकोमा बास्केटबल घुमाएर आफ्नै अघिल्लो कीर्तिमान तोडेका थिए । यसपटक २६ सेकेण्डसम्म टाउकोमा बास्केटबल घुमाएका उनले यसअगाडि भने २३ सकेण्डसम्म घुमाएका थिए ।

गुरागाईंले अर्को एउटा नयाँ कीर्तिमान पनि बनाएका थिए । गुरागाईंले चिउँडोमा सबैभन्दा लामो समय ४ दशमलब १८ मिनेटसम्म कुर्सी अड्याएर नयाँ कीर्तिमान राखेका हुन् ।

शुक्रबार खबरहबले काठमाडौंमा आयोजना गरेको ‘सेलिब्रेसन अफ गिनिज वर्ल्ड रेकर्ड’ कार्यक्रममा राजदूत लेजेले गुरागाईंलाई ४ वटै विश्व कीर्तिमान राखिएका गिनिज बुक वर्ल्ड रेकर्डका प्रमाण पत्र गुरागाईंलाई हस्तान्तरण गरेका हुन् ।

राजदूत लेजेले गुरागाईंले हासिल गरेको विश्व कीर्तिमानमा आफूहरु पनि सहभागी हुन पाएकोमा खुसी व्यक्त गरे ।

गिनिज वर्ल्ड रेकर्ड प्रमाणपत्र हस्तान्तरण कार्यक्रममा नेपालस्थित फ्रेन्च दूतावासका उपप्रमुख अर्नौड च्याम्पी, नेपालस्थित विभिन्न कूटनीतिक नियोगका प्रतिनिधिलगायत सहभागी थिए ।

कार्यक्रममा बोल्दै पेभेलियन मिडियाका अध्यक्ष नरेश श्रेष्ठले ४ वटा विश्व कीर्तिमान राखेकोमा गुरागाईंलाई बधाई ज्ञापन गरे । अध्यक्ष श्रेष्ठले आफ्नो विशेष प्रतिभामार्फत देश र संस्थाको गरिमा बढाएको भन्दै गुरागाईंप्रति आभार समेत व्यक्त गरे ।