काठमाडौं– आगामी मंसिर १४ गते हुने उपनिर्वाचनमा राष्ट्रिय जनता पार्टी नेपालले समाजवादी पार्टीसँग चुनावी तालमेल गर्ने भएको छ ।

मंगलबार बबरमहलस्थित राजपा नेपालको केन्द्रीय कार्यालयमा संयोजक महन्थ ठाकुरको अध्यक्षतामा बसेको अध्यक्षमण्डलको बैठकले सो निर्णय गरेको हो ।

उपनिर्वाचनमा दिइने उम्मेदवारीको सम्बन्धमा निर्णय गर्नुपूर्व समाजवादी पार्टीसँग अविलम्ब वार्ता गरी पहल गर्ने निर्णय अध्यक्षमण्डलको बैठकले गरेको हो । यसअघि पनि प्रतिनिधिसभा तथा प्रदेशसभाको निर्वाचनमा राजपा नेपाल र तत्कालीन संघीय समाजवादी फोरम नेपालले प्रदेश २ मा चुनावी तालमेल गरेको थियो ।

सोही बैठकमा राजपा नेपालको तदर्थ समिति गठन निर्देशिका २०७६ को दफा ६ (ग) मा संशोधन गरी वाक्यको अन्त्यमा ‘प्रतिनिधिसभा निर्वाचन क्षेत्रीय तदर्थ समिति बढीमा ७१ सदस्यीय हुनेछ’ भनी थप्ने निर्णयसमेत गरेको संयोजक ठाकुरले जारी गरेको विज्ञप्तिमा उल्लेख छ ।