नयाँ दिल्ली– भारतका पूर्व वित्तमन्त्री पी चिदम्बरमलाई आगामी १५ दिनसम्म न्यायिक हिरासतमा राख्न अदालतले आदेश दिएको छ ।

भ्रष्टाचारको अभियोग लागेका उनलाई सीबीआई आदालतले आगामी १५ दिनसम्म न्यायिक हिरासतमा राख्न आदेश दिएको हो । उनलाई तिहाड जेलमा राखिने छ ।

हाल उनी भारतको अनुसन्धान व्यूरो सीबीआईको मुख्यालयको अतिथि कक्षमा रहँदै आएका थिए । उनलाई तिहाड जेलको कारागार नम्बर १ को ९ वार्डमा राखिने भारतीय सञ्चारमाध्यमले जनाएका छन् ।

जेलमा उनलाई बेग्लै कक्ष, खाट, पश्चिमा शैलीको शौचालय र औषधीजस्ता सुविधा उपलब्ध गराइने जनाइएको छ । सीबीआईको हिरासतमा उनलाई ९० घण्टामा ४ सयभन्दा धेरै प्रश्न सोधिएको थियो ।

आईएनएक्स मिडियाका सम्बन्धमा वित्तमन्त्री रहँदा चिदम्बरमले आफ्ना छोरा कार्ति चिदम्बरमका नाममा शक्तिको दुरुपयोग गरी ठूलो रकम हिनामिना गरेको अभियोग लागेको छ ।

उनले भने आफूले कुनै गलत काम नगरेको दाबी गर्दै आएका छन् ।