काठमाडौं– नेपाली राष्ट्रिय क्रिकेट टोलीका लेग स्पिनर सन्दीप लामिछाने यतिबेला ग्लोबल टी–२० क्यानडा लिगमा व्यस्त छन् । ग्लोबल टी–२० को टिम टोरन्टो नेसन्समा आवद्ध नेपाली स्पिनर सन्दीपले मोन्टेरियल टाइगर्सविरुद्धको खेलमा यसअघिको खेलमा भन्दा सुधारीएको प्रदर्शन गरेका छन् ।

उनले मोन्टेरियलविरुद्ध ४ ओभर पुरा बलिङ गर्दै २८ रन खर्चिएर १ विकेट हात पारे । सन्दीपले ‘सुधारिएको’ प्रदर्शन गरेको खेलमा टोरन्टो नेसन्सले मोन्टेरियल टाइगर्सविरुद्ध ४ विकेटको जीत हात पारेको छ ।

यसअघि शनिबार राति भएको बह्मटोन बोभ्सविरुद्धको खेलमा सन्दीप निकै महँगा सावित भएका थिए । ग्लोबल टी–२० को यो सिजनमा पहिलो खेलमा मैदान उत्रिएका सन्दीपले ४ ओभर बलिङ गर्दै ४४ रन खर्चेर १ विकेट हात पारेका थिए । तर, दोस्रो खेलमा उनले रनमा नियन्त्रण गर्न सफल भएका छन् । यो सँगै ग्लोबल लिगमा उनले २ विकेट हात पारेका छन् ।

पहिलो खेलमा सन्दीपले धेरै रन खर्चिएपछि दोस्रो आइतबार राति भएको खेलमा टोरन्टोले उनलाई मैदान उतार्नेमा शंका प्रसस्तै थियो । तर, भेट्रान क्रिकेटर युवराज सिंहको नेतृत्व गरेको टोरन्टोले मोन्टिेरियलविरुद्धको खेलमा उनलाई स्थान दिएको थियो ।