काठमाडौं– मंगलबार साँझ पवित्र महिना रमजानको चन्द्रमा हेरेका इस्लाम धर्मावलम्बी बुधबार हर्ष र उत्साहका साथ इद उल फितर मनाइरहेका छन् ।

इद उल फितरका अवसरमा बुधबार बिहानै राजधानीको घण्टाघरस्थित कास्मिरी मस्जिद र रत्नपार्कस्थित जामे मस्जिदमा ठूलो संख्यामा इस्लाम धर्मावलम्बीहरु जम्मा भएका छन् ।

मंगलबार सांझ चन्द्मा हेरपछि इस्लाम धर्मावलम्बीहरुले एक महिना लामो रमजान पर्व पूरा गरि इद उल फितर मनाउँछन् ।

आजको दिन ब्रतालुले एक महिना लामो कठिन ब्रत समापन गर्छन् । इद उल फितरका दिन नमाज पढेर एकआपसमा शुभकामना आदान प्रदान गरी दिन–दुःखी तथा गरिब व्यक्तिलाई दान गर्ने गरिन्छ ।

इद उल फितरको अवसरमा सरकारले बुधबार सार्वजनिक विदा दिएको छ । मुस्लिम आयोगको सिफारिस पछि यसअघि मन्त्रीपरिषद् बैठकले विहिबार सार्वजनिक विदा दिने निर्णय गरेको थियो । मंगलबार सांझ गृहमन्त्रालयले विज्ञप्ती निकालेर बुधबार सार्वजनिक विदा गरिएको जानकारी गराएको हो ।