काठमाडौं– नेपाली कांग्रेसका नेता डा शेखर कोइरालाले जेल बसेका सबै कैदीहरु अपराधी नै हुन भन्न नमिल्ने बताएका छन्।

काठमाडौस्थित सुन्धारामा रहेको केन्द्रीय कारागारमा रहेका अपांग कैदीहरुलाई ह्विलचियर वितरण कार्यक्रममा नेता कोइरालाले जेलमा बसेका सवैलाई अपराधीको सूचिमा राख्न नमिल्ने बताएका हुन् ।

उनले जेल बसेका ब्यक्तिहरु पटक–पटक सत्तामा पुगे पनी उनीहरुले जेल सुधारमा कहिल्यै ध्यान नदिएको बताए । डा कोइरालाले भने–‘कति मानिसले भुलवस कानून तोडेका हुन्छन्। कानूनको नजरमा उनीहरु दोषी ठहरिन्छन् तर वास्तविकता फरक पनि हुन सक्छ। त्यसैले जेल बस्ने सबैलाई अपराधीको सुचीमा राख्न मिल्दैन।’

नेता कोइरालाले कारागारलाई सजायको थलोको रुपमा भन्दा पनि सुधारगृहको रुपमा हेरिनुपर्ने बताए । आधुनिक विश्वमा खुल्ला कारागारको ब्यवस्था रहेको उदाहरण दिँदै डा कोइरालाले प्रहरी र जेल प्रशासनको रहोबरमा कम्युनिटीमै बसेर सजाय भुक्तान गर्न पाउॅने व्यवस्था गरिनुपर्नेतर्फ राज्यले सोच्ने समय आएको समेत बताए ।

कार्यक्रममा ह्विलचियर वितरण संस्थाका अध्यक्ष राकेश हमालले कैदीहरुले न्यूनतम् सेवासुविधा पाउनुपर्ने बताए ।