काठमाडौं– अर्जेन्टिना तथा कार्डिफ सिटीका फरवार्ड इमिलियानो साला र पाइलट डेभिड इबोट्सन वेपत्ता भएको विमानका भग्नावशेष फेला परेको छ ।

विमान वेपत्ता भएको दुई हप्तापछि पाइपर मलिबु विमान आइतबार इङ्ग्लीस च्यानल आइल्यान्डमा भेटिएको बीबीसीले जनाएको छ ।

आइतबार दुर्घटनाग्रस्त अवस्थामा फेला परेको मलिबु विमानको दुर्घटना शाखाले जनाएको छ ।

दुर्घटनाग्रस्त विमानका पार्टपूर्जा समुद्रको सतहभन्दा ६७ मिटर तल रहेको उद्दार टोलीले जनाएको छ ।

“विमानलाई निकालिसकेपछि साला तथा पाइलटका परिवारले जवाफ पाउनेछन्,” जहाज खोजिमा सक्रिय डेभिड मेर्नसले भने । निजी क्षेत्रबाट संकलन भएको कोषद्वारा सञ्चालित खोजीकार्यमा संलग्न मेर्नसले विमानका पार्ट पूर्जा भेटिएको बताएका छन् ।

कार्डिफले सालालाई १ करोड ५० लाख पाउन्डमा अनुबन्ध गरेको थियो । गत महिनाबाट उनी अभ्यासमा सामेल हुने योजनामा थिए । तर, २८ वर्षे साला र ५९ वर्षे पाइलट इबोट्सन नान्टेसबाट उडेको केही समयमै एयर ट्राफिक कन्ट्रोलसँगको सम्बन्धविच्छेद भएको थियो ।