काठमाडौं– यूएईविरुद्धको तीन एकदिवसिय तथा तीन ट्वान्टी—२० शृङ्खलामा समान २—१ को जित हासिल गरेको नेपाली राष्ट्रिय क्रिकेट टोलीलाई नेपाल कम्युनिष्ट पार्टी (नेकपा) का अध्यक्ष पुष्पकमल दाहाल ‘प्रचण्ड’ ले बधाई तथा शुभकामना दिएका छन् ।

मंगलबार आफ्नै निवासमा खेलाडी, प्रशिक्षक तथा प्राविधिक टोलीलाई बोलाएर अध्यक्ष प्रचण्डले खुसी साटेका हुन् ।

खेलाडीको ऐतिहासिक सफलताले विश्व सामू नेपालको सम्मान र इज्जत बढाउन सफल भएको प्रचण्डले बताए ।

“देश समृद्धिको यात्रामा अघि बढेको बेला राष्ट्रिय एकतालाई मजबुत गर्न क्रिकेट खेलमा भएको प्रगतिले ठूलो भुमिका खेलेको छ,” प्रचण्डले भने,“ राज्यले खेल क्षेत्रलाई विशेष महत्व दिएको र चितवनमा बन्ने रंगशालाबाट क्रिकेट खेलको विकासमा झन् योगदान पुग्नेछ ।”

अभ्यक्ष प्रचण्डले क्रिकेटको विकास र खेलाडिको मनोबल उच्च राख्न सक्दो सहयोग गर्ने विश्वास व्यक्त गरे ।