एजेन्सी – पाकिस्तानबाट रिहा भएका भारतीय वायुसेनाका विङ कमाण्डर अभिनन्दनको जुँगा भारतमा फेशन ट्रेण्डको रुपमा विकसित भइरहेको छ । सामाजिक सञ्जाल प्रयोगकर्ताहरुले फेसबूक तथा ट्वीटरमा अभिनन्दनकै शैलीमा आफ्नो जुँगा बनाएर तस्वीर पोस्ट गरिरहेका छन् ।

माइक्रो ब्लगिङ साइट ट्वीटरमा भारतीयहरुले #AbhinandanMustache ट्रेण्ड चलाइरहेका छन् ।

अभिनन्दनको जुँगा पनि अरुभन्दा फरक छ । उनको जुँगा माथिल्लो चिउँडोबाट गालाको दाह्रीसम्म जोडिएको छ । कतिपयले उनलाई चलचित्रका कलाकारको जस्तो भएको भन्दै तारिफ समेत गरेका छन् । अभिनन्दनको गनस्लिङर शैलीको जुँगा गालाको मटन चप दाह्रीमा जोडिएको छ ।

बुधबार भारत र पाकिस्तानको सीमा क्षेत्रमा भएको युद्धका क्रममा भारतीय विमान पाकिस्तानी भूभागमा खसेको थियो । विमान खस्दा अभिनन्दनले प्यारासुटबाट हाम फालेर ज्यान जोगाएका थिए । लगत्तै पाकिस्तानी सेनाले उनलाई हिरासतमा लिएको थियो ।

त्यसपछि पाकिस्तानका प्रधानमन्त्री इमरान खानले ‘शान्तिको सन्देश’ भन्दै अभिनन्दनलाई गत शुक्रबार रिहा गरेका थिए ।

हिरासतमा रहँदा पाकिस्तानबाट अभिनन्दनको भिडियो सार्वजनिक भएको थियो । उनको भिडियो सार्वजनिक भएदेखि नै जुँगाको चर्चा शुरु हुन थालेको हो ।

भारतमा अभिनन्दनलाई ‘हिरो’ शैलीको सम्मान दिइएको थियो । पाकिस्तानबाट रिहा भएर भारत आएपछि अभिनन्दनको सम्मानमा भारतीयहरुले उनकै शैलीको जुँगा बनाउने क्रम जारी छ ।