काठमाडौं–नेपाल कम्युनिस्ट पार्टी नेकपाले दिवंगत नेताद्वय भरतमोहन अधिकारी तथा रवीन्द्र अधिकारीको सम्झनामा फागुन २३ गते बिहीबार श्रद्धाञ्जलीसभा गर्ने भएको छ ।

काठमाडौंको भृकुटीमण्डवमा आयोजना हुने सभालाई नेकपाका अध्यक्षद्वय केपी शर्मा ओली र पुष्पकमल दाहाल प्रचण्डले सम्बोधन गर्ने कार्यक्रम रहेको नेकपा पार्टी कार्यालयका सचिव कृष्णगोपाल श्रेष्ठले जानकारी दिए । श्रद्धाञ्जलीसभालाई सफल पार्न नेकपाले सम्पूर्ण जनवर्गीय संगठनलाई निर्देशन दिएको पनि उनले बताए ।

श्रद्धाञ्जलीसभाको तयारीका विषयमा छलफल गर्न हिजो (सोमबार) पार्टी कार्यालय धुम्बाराहीमा बैठक बसेको भन्दै श्रेष्ठले कार्यक्रममा प्रदेश ३ र उपत्यकाका तीन जिल्ला काठमाडौं, भक्तपुर र ललितपुरका पार्टी पंक्तिलाई परिचालन गर्ने निर्णय भएको बताए ।

ताप्लेजुङमा भएको हेलिकोप्टर दुर्घटनामा परी ज्यान गुमाएका संस्कृति, पर्यटन तथा नागरिक उड्डयनमन्त्री रवीन्द्र अधिकारीसहित सातै जनाको सम्झनामा श्रद्धाञ्जलीसभा गर्ने निर्णय गरेको थियो ।

उपचारत पूर्वउपप्रधान तथा अर्थमन्त्री भरतमोहन अधिकारीको निधन भएपछि आइतबार बसेको नेकपा सचिवालय बैठकले दुवै नेताको सम्झनामा एकै दिन श्रद्धाञ्जलीसभा गर्ने निर्णय गरेको कार्यालयका सचिव श्रेष्ठले बताए ।