काठमाडौं–नेपाली कांग्रेसका सहमहामन्त्री प्रकाशशरण महतले बेलायती गोर्खा सैनिकका समस्या समाधानमा सरकार गम्भीर बन्नुपर्ने बताएका छन् ।

उनले गोर्खा सैनिकहरुको तलब, सेवा सुविधा समानताका हुनुपर्ने विषयमा सरकार गम्भीर बन्नुपर्ने बताएका हुन् । भूतपूर्व गोर्खा सैनिक र नागरिक समाजले राजधानीमा गरेको कार्यक्रममा सहमहामन्त्री महतले बिर्टिस सैनिकमा नेपाली भएकै कारण तलब सेवा सुबिधामा विभेद हुनु निकै दुखद भएको बताए ।

उनले तलब सेवा सुबिधा समान नभए बिर्टिस सैनिकमा नेपालीलाई नपठाउने चेतावनी दिन पनि सरकारलाई आग्रह गरे।सहमहामन्त्री महतले आफू परराष्ट मन्त्री हुँदा पनि यो बिषयमा सशक्त हिसाबले उठाएको स्मरण गर्दै यो समस्या समाधानका निम्ति नेपालका लागि बेलायतका राजदुत मार्फत बेलायत सरकारलाई बिर्टिस सैनिकमा तलब सेवा सुबिधा बराबरी गर्नका लागि चिठी समेत पठाएको उल्लेख गरे।

आफूले बिर्टिस सैनिकका समस्या समाधानका लागि धेरै कामको सुरुवात गरेको भन्दै अहिलेको सरकार ती कामलाई पूरा गर्न गम्भीर बन्नु पर्ने पनि जिकिर गरे।

सहमहामन्त्री महतले नेपालीले बिर्टिस सेना भन्दा पनि काम बढी गर्ने तर सेवा सुबिधा भने कम पाउने कुरा न्यायोचित नभएको बताए ।