काठमाडौं– बाराको महागढीमाई नगरपालिका वडा नम्बर ६ का वडाध्यक्ष घुस लिँदा लिँदै रंगेहात पक्राउ परेका छन् ।

वडा नम्बर ६ का निर्वाचित वडाध्यक्ष रामजीप्रसाद बरै २ लाख ७५ हजार रुपैयाँ घुससहित रंगेहात पक्राउ परेका हुन् ।

वडाध्यक्ष बरैले सांसद विकास कोषबाट आएको रकमबाट नेपाल राष्ट्रिय माध्यमिक विद्यालय बुबुआइनको कम्पाउण्ड वाल बनाउन उपभोक्त समिति काम शुरु गर्ने बहानामा घुस मागेका थिए ।

वडाध्यक्ष बरैले घुस मागिरहेको भन्ने पूर्वसूचनाका आधारमा अख्तियार दुरुपायोग अनुसन्धान आयोगको हेटौंडास्थित कार्यालयबाट गएको टोलीले उनलाई रंगेहात पक्राउ गरेको हो ।

वडाध्यक्ष बरैसहित उनकै वडाका अर्का एक जना मुसहर बैठालाई पनि अख्तियारले नियन्त्रणमा लिएको छ ।

दुवैजनालाई घुस लिँदा लिँदै बाराको कलैया उपमहानगरपालिका–७ स्थित दूर्गा माध्यमिक विद्यालयका हाताबाट नियन्त्रणमा लिइएको अख्तियार दुरुपयोग अनुसन्धान आयोगका केन्द्रीय प्रवक्ता प्रदीपकुमार कोइरालाले जानकारी दिएका छन् ।