थाइल्याण्ड– थाइल्याण्डका राजा महा वाजिरलङकोर्णले शनिबार औपचारिक राज्याभिषेक गरेका छन् । राजधानी बैंककमा रहेको दरबारमा जल सेचन गरेर राज्याभिषेक गरेका हुन् ।

स्थानीय समय अनुसार शनिबार विहान ९ बजेदेखि सुरु भएको राज्याभिषेक समारोह दिउसो १ बजे सम्म चलेको थियो ।राज्याभिषेक समारोहमा राज्याभिषेकका लागि राजा वाजिरलङकोर्ण रानी सुथिदासहित उपस्थित थिए ।

थाई नरेशले हालै आफ्नी अंगरक्षक सुथिदासँग औपचारिक रुपमा विवाह गरेका थिए ।थाईल्यान्डमा लामो समय राज्य गरेका भूमिबोल अदुल्यादेजको सन् २०१६ मा निधन भएपछि उनका छोरा वजिरालंगकर्ण राजा बनेका हुन् ।

थाइल्याण्डमा राज्याभिषेकलाई राज्य संचालनको पूर्ण अधिकारका लागि गरिने एउटा महत्वपूर्ण सांस्कृतिक प्रक्रियाको रुपमा लिइन्छ । पवित्र जल राजाको शिरमा छर्केर शुद्ध बनाएर राज्याभिषेक गराइने धार्मिक तथा संस्कृतिक परम्परा छ ।थाईल्यान्डमा संवैधानिक राजतन्त्र छ । राजपरिवारलाई थाईहरुले निकै श्रद्धापूर्व लिने गरेको बताइन्छ ।