एजेन्सी – टोटनह्याम हट्सपुर इङग्लीस प्रिमियर लिगको शीर्ष तेस्रो स्थानमा उक्लिएको छ । बुधबार राति पहिलो पटक आफ्नो नयाँ बनेको घरेलु मैदानमा खेलेको टोटनह्यामले क्रिस्टल प्यालेसलाई २—० गोलले पराजित गर्यो ।

नयाँ रंगशाला बनाएपछि पहिलो पटक आफ्नै मैदानमा खेलेको टोटनह्यामले सुखद् सुरुवात गरेको छ । यसअघि आर्सनलले चौथौ स्थानमा झारेको टोटनह्यामले क्रिस्टल प्यालेसलाई पराजित गरेपछि आर्सनललाई उछिन्दै तेस्रो स्थानमा उक्लिएको हो ।

टोटनह्यामका लागि सन ह्युङ मिन र क्रिष्टियन इरिकसेनले गोल गर्दै टिमलाई जीत दिलाए । कोरियाली खेलाडी मिनले खेलको ५५ औं मिनेटमा गोल गर्दै टिमलाई अग्रता दिलाए भने इरिकसेनले खेलको ८० औं मिनेटमा गोल गर्दै दोहोरो अग्रता बनाएका थिए ।

इरिकसेनको उक्त गोल टोटनह्यामको जितका लागि निर्णायक बन्यो । जीत हात पारेको टोटनह्यामको ६४ अंक छ भने चौथो स्थानमा झरेको आर्सनलको ६३ अंक छ ।