– हृदयेश त्रिपाठी

भरतमोहन अधिकारी ग्रामीण अर्थतन्त्रलाई महत्व दिने पहिलो नेता हो । ग्रामीण अर्थतन्त्र आक्रान्त रहेका बेला उहाँले त्यसलाई पुनर्जीवन दिने काम गर्नुभयो ।

उहाँले ग्रामीण अर्थतन्त्रको संभावनालाई पहिचान गर्ने काम पनि गर्नुभयो ।

ग्रामीण जनजीवन आक्रान्त छ, ग्रामीण जनजीवनलाई परिवर्तन नगरेसम्म नेपालमा परिवर्तन हुँदैन भन्ने उहाँको मान्यता थियो । त्यो मान्यतालाई स्थापित गर्ने प्रयास पनि गर्नुभयो, आफू अर्थमन्त्री हुँदा । उहाँको त्यो योजनाले अहिले आकार लिइरहेको छ ।

पछिल्लो पटक मैले भेट्दाखेरि पनि उहाँ स्थानीय र प्रदेश सरकारलाई दिइने अधिकारबारे चिन्तित हुनुहुन्थ्यो । तपाईंहरुले आवाज अलिकति दरिलो गर्नुभएन भन्ने उहाँको गुनासो पनि थियो ।

उहाँ निरन्तर सोचमा रहने नेता हुनुहुन्थ्यो । खासगरी ग्रामीण क्षेत्रका जनताको हित, ग्रामीण जनजीवनको उत्थान र आत्मनिर्भर अर्थतन्त्र निर्माणमा उहाँ जहिल्यै सक्रिय रहिरनुहुन्थ्यो ।

उहाँमा छलकपट, कुनै पनि कुरामा जालझेल गर्ने बानी थिएन । आफ्ना कुरा स्पष्ट राख्नुहुन्थ्यो ।

उहाँका धेरै योजना अहिले कार्यान्वयनको चरणमा छन् । ग्रामीण अर्थतन्त्रलाई बलियो बनाउने उहाँको जुन सपना थियो, अबको पुस्ता र अहिलेको सरकारले त्यसालाई पूरा गर्नुपर्छ ।

खबरहबकर्मी सविना कार्कीसँगको कुराकानीमा आधारित