एजेन्सी– वैज्ञानिकहरुले आँखामा लगाउन मिल्ने यस्तो विशेष लेन्सको विकास गरेका छन्, जसले आँखाको चालमा टाढा वा नजिकको वस्तु स्पष्ट देखाउने छ ।

झिम्काउँदा तथा दायाँ, बायाँ आँखा नच्चाएकै भरमा उक्त लेन्सले आँखामा दृष्य हेर्न सक्ने विशेष क्षमता प्रदान गर्ने छ । यो क्षमता क्यालिफोर्निया विश्वविद्यालका अनुसन्धानकर्ताहरुले विकास गरेको रोबोटिक सफ्ट कन्ट्याक्ट लेन्सले प्रदान गर्ने दावी गरिएको छ ।

यो लेन्स प्रयोगमा आएपछि दृष्टि कमजोर हुने व्यक्तिलाई उपयोगी हुने अनुसन्धानकर्ताहरुले बताएका छन् । लेन्स चस्माको विकल्प हुने उनीहरुको दावी छ । हालसम्म अनुसन्धानकर्ताले लेन्सको प्रोटोटाइप मात्र तयार पारेका छन् ।

अनुसन्धानकर्ताका अनुसार उक्त लेन्स प्रयोगमा ल्याउनुपूर्व कयैन प्रयोग गर्न बाँकी छ ।

अनुसन्धानदाताका अनुसार टाढा वा नजिकको वस्तु हेर्नको लागि आखाँको चाल बदल्नुपर्छ । हेर्दा सामान्य लेन्सजस्तै देखिने यो लेन्समा जैविक तन्तुको स्थानमा इलेक्ट्रो–एक्टिव पोलिमर फिल्मको प्रयोग गरिएको छ ।

यसमा खास प्रकारको तारको प्रयोग गरिएको छ जसले सिग्नल उत्पन्न गर्छ । यसले लेन्सलाई फैलाउन र खुम्चाउन सहयोग गर्छ ।

यस लेन्स प्रयोग गर्नको लागि दुई पटक आँखा झिम्काउदा टाढाको र पुनः दुई पटक आँखा झिम्काउँदा, नजिकको चीज स्पष्ट देखिन्छ ।

मानिस र जनावरले जसरी नजिक वा टाढाको वस्तु देख्छ बायोमिट्रिक लेन्सलाई त्यसरी नै तयार गरिएको हो । यो लेन्सको प्रयोग भविष्यमा बन्ने रोबोटका आँखा बनाउन पनि प्रयोग गर्न सकिन्छ ।

सन् २०१४ मा गूगलले पनि स्मार्ट कन्ट्याक्ट लेन्सको काम सुरु गरेको थियो । त्यस लेन्सले मुधुमेहका रोगीको आँशुबाट नै ग्लूकोजको स्तर जाँच लिने हिसाबले बनाइएको थियो । तर उक्त परियोजना सन् २०१८ मा रोकियो ।