काठमाडौं– एकदिवसीय विश्वकप क्रिकेटमा पाकिस्तानले घरेलु टोली इंग्ल्याण्डलाई ३ सय ४९ रनको विशाल लक्ष्य प्रस्तुत गरेको छ । नोटिनघामस्थित ट्रेन्ट ब्रिजमा भइरहेको खेलको पहिलो इनिङ्समा पाकिस्तानले निर्धारीत ५० ओभर पूरा खेल्दै ८ विकेट गुमाएर ३ सय ४८ रन बनाएको हो ।

घरेलु टोलीविरुद्ध पाकिस्तानी ब्याट्सम्यानले उत्कृष्ट शुरुवात गर्दै आफ्नो लय पूरा खेलभरी कायम राख्दा इंग्ल्याण्डविरुद्ध ठूलो लक्ष्य प्रस्तुत गर्न सफल भएको हो । इंग्ल्याण्डका बलरमाथि हावी भएका पाकिस्तान बलरहरुले सम्मानित रन बनाउने क्रममा पाकिस्तानका ३ जना ब्याट्सम्यानले अर्धशतक बनाए ।

यसअघि पहिलो खेलमा पाकिस्तानी ब्याट्सम्यानको कमजोर प्रदर्शनकै कारण १०५ रनमा समेटिएको थियो भने इंग्ल्याण्डविरुद्ध पाकिस्तानी ब्याट्सम्यानले उत्कृष्ट कमब्याक गरेका छन् ।

पाकिस्तानका लागि मोहम्मद हफेजले ८४ रनको इनिङ्स खेले । उनले ६२ बलमा ८ चौका र २ छक्का प्रहार गरे । यस्तै, बाबर अजामले ६३ रन बनाए । उनले ६६ बलको सामना गर्दै ४ चौका र १ छक्का प्रहार गरे भने कप्तान सरफराज अहमदले ४४ बलमा ६ चौका प्रहार गर्दै ५५ रन बनाए । यस्तै, इमाम यल हकले ४४ रन, फकर जमानले ३६ रन र आसिफ अलिले १४ रन बनाए ।

टस जितेर पहिलो फिल्डिङ रोजेको इंग्ल्याण्डका मोइन अलि र क्रेस वार्केसले समान तीनतीन विकेट लिए भने मार्क उड दुई विकेट लिए । घरेलु टोलीले पहिलो बलिङ रोजे पनि बलरहरुले लय समात्न नसक्दा पाकिस्तानी बलरलाई रोक्न सकेन् । यसअघि पहिलो खेलमा पाकिस्तान वेष्ट इन्डिजसँग पराजित भएको थियो भने इंग्ल्याण्डले पहिलो खेलमा दक्षिण अफ्रिकालाई पराजित गरेको थियो ।