रुकुम– रुकुममा शुक्रबार साँझ भएको जीप दुर्घटनामा एक बालिकाको मृत्यु भएको छ भने ५ जना घाइते भएका छन् ।

रुकुम पश्चिमको सदरमुकाम खलंगाबाट रुकुम पूर्वको सिस्ने गाउपालिका–७, सिस्नेरी जाँदै गरेको लु १ ज १७८१ नम्वरको जीप दुर्घटना भएको हो ।

दुर्घटनामा सिस्ने गाउँपालिका–८, की ९ महिने निर्जला रावलको मृत्यु भएको प्रहरीले जनाएको छ । सिस्ने गाउपालिका–८, झिमखोलामा शुक्रबार बेलुकी भएको उक्त दुर्घटनामा परी ५ जना घाइते भएका छन् ।

दुर्घटनामा परी सिस्ने गाउपालिका–८, भुरुङ्गाकी मृतक बालिकाकी आमा २४ वर्षीया रमिता रावल, सोही वडा धपेका १७ वर्षीय मोहन चन्द र भुरुङ्गाकै २५ वर्षीय गाडी चालक राजन बोहरा घाइते भएका छन् । यसैगरी सिस्ने गाउपालिका–७, नाथीडाकी १६ वर्षीया इश्वरी गौतम, र १७ वर्षीया ज्ञानु रेउले पनि घाइते भएका छन् ।

घाइते सबैको स्वास्थ्य चौकी धपेमा प्राथमिक उपचार गरी जिल्ला अस्पताल रुकुम पश्चिम ल्याइएको छ । दुर्घटनाको कारण खुल्न नसकेको जिल्ला प्रहरी कार्यालयका निमित्त प्रमुख प्रहरी निरीक्षक बीरबहादुर सुनारले जानकारी दिए ।

जीप सडकबाट करिब ३ सय मिटर तल खसेको प्रहरी निरीक्षक सुनारले जानकारी दिए ।