काठमाडौं– सरकारले कर्मचारी समायोजनका सम्बन्धमा आएका गुनासा यही महिना भित्रै संबोधन गर्ने जनाएको छ ।

साथै समायोजनका क्रममा समस्यामा परेका कर्मचारीका सम्बन्धमा पहिलेको निर्णयमा पुनर्विचार गर्ने पनि सरकारको तयारी छ ।

संघीय मामिला तथा सामान्य प्रशासन मन्त्री लालबाबु पण्डितले कर्मचारी समायोजनाका सम्बन्धमा आएका सबै गुनासा वैशाख महिनाभित्रै संबोधन गर्ने बताए ।

शुक्रबार राजधानीमा आयोजित एक साक्षात्कार कार्यक्रममा बोल्दै मन्त्री पण्डितले भने, ‘समायोजनका सन्दर्भमा प्रशासन समूहका कर्मचारीको धेरैजसो टुंगिसकेको छै । स्वास्थ्यमा धमाधम काम भइरहेको छ ।’

मन्त्री पण्डितले समायोजन सम्बन्धी सबै गुनासोको एक हप्ताभित्रै समाधान गर्नेगरी काम भइरहेको उल्लेख गर्दै बढीमा यो महिनाभित्र सबै काम सकिने बताए ।

‘महिला र कडा रोग लागेका कर्मचारीको गुनासोलाई पहिलो प्राथमिकतामा राखेर काम भइरहेको छ । महिलालाई उहाँहरुको पहिलो रोजाइलाई प्राथमिकता दिइएको छ,’ पण्डितले भने, ‘कडा रोग लागेका कर्मचारीलाई उपचारको लागि पायक पर्ने र परिवारको नजिक पर्ने गरी व्यवस्थापन गर्ने काम भइरहेको छ ।’