एजेन्सी– द्रुत रुपमा वृद्धि भइरहेको इन्टरनेट उपकरणका कारण इन्टरनेटसँग जोडिएका ग्याजेटलाई थप सुरक्षित गर्न बेलायतले नयाँ कानुन बनाउने तयारी गरेको छ ।

सुरक्षा कमजोरीको फाइदा उठाउँदै पछिल्लो केही वर्ष यताबाट साइबर ह्याकरहरुले खेलौना तथा इन्टरनेटमा जोडिएका ओभनहरुलाई लक्षित गर्न थालेपछि सुरक्षा चासो बढाइएको हो ।

नयाँ कानुनअनुसार यस्ता उपकरणहरुमा युनिक पासवर्ड राखिनु पर्नेछ । प्रविधि विज्ञहरुले उपभोक्ताहरुको सुरक्षाका लागि यो सकारात्मक कदम भएको बताएका छन् । बजार विश्लेषक गार्थनरका अनुसार विश्वभर सन् २०१९ को अन्त्यसम्ममा १४ दशमलब २ अर्ब इन्टरनेट जोडिएका उपकरणहरु प्रयोगमा आउने छन् ।

यसमा टेलिभिजन, स्मार्ट स्पिकर तथा घरमा प्रयोग हुने उपकरणहरु इन्टरनेटमा जोडिएका सबै पर्छन् । साइबर आतंकवादीहरुले ह्याक गरी इन्टरनेटमा जोडिएका त्यस्ता उपकरणहरुलाई गलत कार्यमा प्रयोग गर्न सक्ने, व्यक्तिगत तथ्यांक चोर्ने तथा प्रयोगकर्ताको जासूसी गर्ने खतरा रहने छ ।