काठमाडौं– काठमाडौंमा दक्षिण एशीयाली लेखा व्यवसायी महासंघको सम्मेलन हुने भएको छ ।

नेपाल चार्टर्ड एकाउन्टेन्ट्स संस्था(आईक्यान)ले बुधबार काठमाडौंमा पत्रकार सम्मेलन गरी दक्षिण एशीयाली लेखा व्यवसायी महासंघको सम्मेलन आयोजना गर्न लागिएको जानकारी गराएको हो ।

बिहीबारबाट सुरु हुने ३ दिने सम्मेलनमा आर्थिक विकासका लागि आवश्यक लेखा प्रणालीका विषयमा छलफल हुने आईक्यानका अध्यक्ष जगन्नाथ उपाध्यायले जानकारी दिए । मुलुकलाई समृद्ध बनाउने अभियानमा साथ दिने उद्देश्यका साथ सो सम्मेलन नेपालमा आयोजना गर्न लागिएको पनि आईक्यानले जनाएको छ ।

अर्थमन्त्री डा. युवराज खतिवडाले उद्घाटन गर्ने सम्मेलनको पहिलो दिन आर्थिक विकासका लागि आवश्यक वातावरणको विषयमा छलफल हुनेछ । त्यसै गरी दोस्रो दिन शुक्रबार महासंघका स्थायी समिति र शनिबार महासंघको बोर्ड बैठक बसी सम्मेलन समापन हुनेछ ।

अध्यक्ष उपाध्यायले अन्तराष्ट्रिय लेखा प्रणालीका नयाँ–नयाँ प्रविधिबारे जानकारी लिन पनि सम्मेलन तथा बैठकहरु उपयोगी हुने पनि बताए ।