काठमाडौं– बारामा हावाहुरीबाट पीडितको उद्धार र राहतका लागि यतिबेलमा काठमाडौंबाट प्रभावित क्षेत्रमा जानेको संख्या बढेको छ ।

राजनीतिक दलका शीर्ष नेता, कार्यकर्ता, कलाकार, समाजसेवी, सर्वसाधारण लगाय प्रभावित क्षेत्रमा राहत लिएर गइरहेका छन् ।
उनीहरुले राहत वितरणको तस्वीरसमेत सामाजिक सञ्जालमा राखिरहेका छन् ।

यसैक्रममा मंगलबार साँझदेखि समाजिक सञ्जालमा एकाएक गायिका अन्जु पन्तको एउटा फोटो भाइरल बन्यो ।

गाडीमा केही कालो बस्तु (राहत सामाग्री) र केही थान पुस्तक राखिएको तस्वीरको अगाडि गायिका पन्त उभिएकी छिन् । यो तस्वीरलाई सामाजिक सञ्जालमा पोस्ट गर्दै मानिसहरुले केही पोका राहत सामाग्रीसहित बाइबल(क्रिश्चियन धर्मको ग्रन्थ) लिएर प्रभावित क्षेत्रमा जान लागेकी गायिका भन्दै फोटो पोस्ट भइरहेको छ ।

हिन्दूवादीहरुले विपतमा परेको मानिसमाथिको खेलवाड र राहतको नाममा क्रिश्चियन धर्मको प्रचारका लागि बारा जान लागेको भन्दै अन्जु पन्तको आलोचना भएको थियो ।

हिन्दूवादी देश वनाउनुपर्छ भन्दै वकालत गर्दै हिँडेका राप्रपाका अध्यक्ष कमल थापाले समेत यसको विरोध गरेका थिए । तर यसको वास्तविकता भने फरक परेको छ ।

अन्जु पन्त हावाहुरी प्रभावित बारा बाइबलसहित गएको भन्दै सामाजिक सञ्जालमा उछित्तो काडिएको फोटो त २०७५ साल मंसिर १९ गते बुधबार गायिका पन्तले फेसबुकमा पोस्ट गरेको फोटो रहेछ ।

उनले फोटो पोस्ट गर्र्दै गराएको जानकारी अनुसार अन्जु पन्त फाउण्डेसनले विरगञ्ज कारागारको समता स्कुलका विद्याथीहरुका लागि १०० वटा स्कूल व्इाग, ४०० कापी, १०० इरेजर, १०० कटर तथा चकलेट वितरण गर्न जाँदाको रहेछ ।

पन्त धर्मपरिवर्तन गरी क्रिश्चियन धर्ममा गएका कारण बेला बेलामा उनीविरुद्ध यस्तो प्रचार हुने गरेको छ ।