काठमाडौं– न्याय परिषदले विभिन्न जिल्लामा रिक्त रहेका ७ जना जिल्ला न्यायाधीशहरु नियुक्त गरेको छ ।

मंगलबार बसेको परिषदको बैठकले सिफारिस गरेका ७ जना जिल्ला न्यायाधीशलाई मंगलबार नै नियुक्त गरिएको हो ।

परिषदले देशभरका विभिन्न अदालतमा कार्यरत कर्मचारी मध्येबाट जिल्ला न्यायाधीश नियुक्त गरेको हो ।

जसअनुसार उच्च अदालत तुलसीपुरको बुटवल इजलाशका रजिष्ट्रार गेहेन्द्रराज पन्त भोजपुरको जिल्ला न्यायाधीशमा नियुक्त भएका छन् भने सर्वोच्च अदालतका उपरजिष्ट्रार विद्याराज पौडेल रुकुमको जिल्ला न्यायाधीशमा नियुक्त भएका छन् ।

यस्तै, सर्वोच्चकै अर्का उपराजिष्ट्रार महेन्द्रराज काफ्ले सोलुखुम्बुको जिल्ला न्यायाधीशमा नियुक्त भएका छन् भने उच्च अदालत दिपालयको महेन्द्रनगर इजलाशका रजिष्ट्रार टेकराज जोशी डोल्पा जिल्ला अदालतको न्यायाधीश नियुक्त भएका छन् ।

सर्वोच्च अदालतकी उपरजिष्ट्रार इन्दिरा शर्मा झापा जिल्ला अदालतको न्यायाधीश नियुक्त हुँदा सर्वोच्च्कै अर्की उपरजिष्ट्रार मनकुमारी जीएम विक बाँके जिल्ला अदालतकी न्यायाधीश नियुक्त भएकी छन् भने उपरजिष्ट्रार रिता कुमारी बख्रेल सप्तरी जिल्ला अदालतको न्यायाधीश नियुक्त भएकी छन् ।

मंगलबार बसेको परिषदको बैठकले ५ जना जिल्ला न्यायाधीशको सरुवा समेत गरेको छ ।

जसअनुसार भोजपुर जिल्ला अदालतका न्यायाधीश खिलनाथ रेग्मी बारा जिल्ला अदालतमा सरुवा भएका छन् भने सोलुखुम्बु जिल्ला अदालतका न्यायाधीश अमृतबहादुर बस्नेत झापा जिल्ला अदालतमा सरुवा भएका छन् ।

यस्तै, नवलपुर जिल्ला अदालतका न्यायाधीश अम्बिकाप्रसाद निरौला काठमाडौं जिल्ला अदालतमा सरुवा हुँदा दोलखा जिल्ला अदालतका न्यायाधीश तेजबहादुर खड्का मोरङ जिल्ला अदालतमा सरुवा भएका छन् भने रुकुम जिल्ला अदालतका न्यायाधीश आत्मदेव जोशी धादिङ जिल्ला अदालत सरुवा भएका छन् ।