कास्की– १७औँ संस्करणको आहा रारा गोल्डकपको उपाधि थ्रीस्टार क्लबले जितेको छ। विभागीय टोली त्रिभुवन आर्मी क्लबलाई सडन डेथमा ५–४ ले हराउँदै थ्रीस्टार च्याम्पियन बनेको हो ।

शनिबार पोखरा रंगशाला भएको खेलको निर्धारित समय १–१ गोलको बराबरीमा सकिएको थियो। थप गरिएको ३० मिनेटमा दुवै टिमले १–१ गोल गरेपछि खेल २–२ को बराबरीमा टुंगिएको थियो। त्यसपछि भएको पेनाल्टी सुटआउटमा थ्रीस्टारले ५–४ गोल अन्तरले जित हात पारेको हो ।

पेनाल्टी सुटआउटमा थ्रीस्टारका लागि रञ्जीत धिमाल, रुपेश केसी, विक्रम लामा, अनन्त तामाङ र मिक्छेन तामाङले गोल गरे। सुशील राईको प्रहार क्रसबारमा लागेर फर्कियो। आर्मीका लागि कप्तान भरत खवास, जर्जप्रिन्स कार्की, सन्तोष तामाङ र टंक बस्नेतले गोल गरे। गोलकिपर विकेश कुथु र विकास खवासको प्रहार थ्रीस्टारका गोलकिपर एलन न्यौपानेले विफल पारेका थिए ।

जितसँगै थ्रीस्टारले ८ लाख एक हजार नगदसहित ट्रफी उचालेको छ भने उपविजेतामा चित्त बुझाएको आर्मीले ४ लाख एक हजार रुपैयाँ प्राप्त गरेको छ ।