काठमाडौं– प्रधानमन्त्री केपी शर्मा ओलीले नेपाल टेलिकमले सातै प्रदेशमा आजबाट शुरुवात गरेको फोर जी सेवासँगै मुलुकले नयाँ युगमा फड्को मारेको बताएका छन् ।

फोरजी सेवा विस्तारको उद्घाटन कार्यक्रममा सम्बोधन गर्दै प्रधानमन्त्री ओलीले ‘विकासको बाटोमा नेपाल’ नाराका साथ सरकार अघि बढिरहेको बताए । उनले यस सेवामा आउने समस्या सुधारका लागि नीति, कार्ययोजना बनाएर अघि बढेको बताए ।

उनले हामी हरेक दिन एक कदम अघि बढिरहेका बताए । ‘अस्तिको दिन मात्रै हामीले एउटा नयाँ घोषणा गर्‍यौं खुला दिशामुक्त क्षेत्र । यसले हामीलाई सभ्यताको उचाईमा लग्यो । हजारौं वर्षदेखिको पछौटेपन अन्त्य गरेको छ । यो सानो कुरा होइन ।’ उनले भने, ‘ आज फेरि सातै प्रदेशमा फोर जी सेवाको विस्तार गरेका छौं, यो महत्वपूर्ण उपलब्धि हो ।’

उनले यति मात्र नभएर पूर्वाधार निर्माण, शिक्षा, स्वास्थ्य, कृषिको आधुनिकीकरण लगायतका क्षेत्रमा पनि फड्को मारिरहेको बताए ।

उनले नेपालले पर्यटन वर्ष घोषणा गरेर २० लाख पर्यटक भित्र्याउने लक्ष्य लिएको बताउँदै अहिलेको स्थिति हेर्दा २४–२५ लाख पर्यटक भित्रन सक्ने दाबी गरे ।

यसका लागि अन्तर्राष्ट्रिय एयरपोर्टको काम अघि बढिरहेको बताए । साधन स्रोत र सामर्थ्य, बाह्य लगानी बाह्य स्रोत, टेक्नोलोजी, विज्ञान प्रविधिमा सरकाले विशेष ध्यान दिइरहेको बताए ।

प्रधानमन्त्री ओलीले समय तीव्रताका साथ अघि बढ्दै गएको बताउँदै भने, ‘पहिले टेलिफोन दरबारमा मात्र हुन्थ्यो, म युवा हुँदा हामी आबा गर्न जान्थ्यौं, कति दिन हिडेर पुग्नुपर्थ्यो, पछि टेलिफोन आयो । रेडियोमा समाचार सुन्दा अचम्म लाग्ने अवस्था थियो । अलि पछाडि टेलिभिजन आयो, टेलिफोनहरु आउन थाले । कडलेस आयो बोकेर हिड्न सकिने अवस्था भयो । अब फोरजी सेवा पनि हाम्रै पालामा विस्तार भएको छ ।’

फोर जीको विस्तारले मुलुक नयाँ युगमा फड्को मारेको बताउँदै यसले शिक्षा स्वास्थ्य लगायतका क्षेत्रमा महत्वपूर्ण योगदान दिने विश्वास लिए । उनले भने , ‘यसले हामीलाई देशको अर्थतन्त्रमा समेत सेवा दिनेछ ।’

उनले विकास निर्माणका काममा पनि सवैलाई ध्यान दिन आग्रह गरे । जिम्मा लिने कम्पनीहरुले तीव्रताका साथ काम अघि बढाउन आग्रह गरे । कुनै पनि काममा बिलम्व सैह्य नहुने भन्दै काममा लापरबाही नगर्न सुझाए ।

उनले भने, ‘धेरै काम लिने पूरा नगर्ने कुरा अब स्वीकार्य हुने छैन । समयमा काम सम्पन्न हुनु नै जनताले सेवा प्राप्त गर्नु हो । विकासमा फड्को मार्नु हो । यसतर्फ सचेत बनौं ।’

उनले कुनै पनि काम सम्पन्न नगरी अलमलिएर विलम्ब गर्नु भनेको विकासमा पछि पर्नु हो यस्ता कुरा सैह्य  हुनेछैनन् ।

सरकारी स्वामित्वको नेपाल टेलिकमले ३२ जिल्लाका ५० भन्दा बढी शहरमा चौथो पुस्ताको फोरजी सेवा सञ्चालनमा ल्याएको हो । प्रधानमन्त्री केपी शर्मा ओलीले आज सातै प्रदेशका मुख्यमन्त्रीसँग स्विच दबाएर फोरजी प्रविधिमार्फत ‘भिडियो कन्फरेन्स’ गरी सेवा शुभारम्भ भएको घोषणा गरेका हुन् ।