काठमाडौं- नेपाल भ्रमणमा रहेका भारतीय जनता पार्टी भाजपाका विदेश विभाग प्रमूख डा. विजय चौथाइवालले नेपालको आर्थिक विकास भारतको चाहना रहेको बताएका छन् ।

नेपाल भारत मैत्री समाजले काठमाडौंमा आयोजना गरेको कार्यक्रममा उनले नेपालको जलस्रोतलाई भारतको उर्जाका रुपमा प्रयोग गर्न आपसी समझदारी आवश्यक रहेको बताए ।

प्रधानमन्त्री नरेन्द्र मोदीको कार्यकालमा भारत समृद्ध बनेको दाबी गर्दै उनले अब भारतको विकासबाट नेपालले सिक्नुपर्ने बेला आएको बताए ।

कार्यक्रममा नेपाली कांग्रेस नेता डा.रामशरण महतले दुई देशबीचको व्यापार घाटा कम गर्ने गरी सरकारी तहबाट समन्वय गरेर अघि बढ्नुपर्ने बताए ।

नेपालका लागि भारतीय राजदूत मञ्जिवसिंह पुरीले भारतीय प्रम नरेन्द्र मोदी आफ्ना जनताका सुखदुःखप्रति गम्भीर रहेको बताए ।