काठमाडौं– नख्खु कारागारमा कैदीबन्दीबीच झडप भएको छ । झडपमा एक कैदीको मृत्यु भएको छ ।

आज (शुक्रबार) १२ बजेपछिको समयमा भएको झडपमा परी कैदी पूर्णबहादुर राजीको मृत्यु भएको हो ।

कारागार सुरक्षा कार्यालय नख्खुका अनुसार कोमलकुमार महतोले पूर्णबहादुर राजीलाई आक्रमण गरेका थिए । महतोले सिमेन्टको ब्लकले हानेका थिए । पूर्णबहादुरको घटनास्थलमै मृत्यु भएको जनाइएको छ ।

आक्रमण गर्ने दुवै कर्तव्य ज्यान मुद्दाका कैदीबन्दी हुन् । अहिले घटनास्थलमा पुगेको टोलीले घटनाका बारेमा अनुसन्धान गरिरहेको छ । आक्रमण गर्नेलाई नियन्त्रणमा लिएको प्रहरीले जनाएको छ ।

कारागार सुरक्षा कार्यालय नख्खुका एक अधिकारीका अनुसार दुवैजनाबीच यसअघि विवाद थिएन । झडपमा ज्यान गुमाएका राजी मानसिक रुपमा केही अस्वस्थ थिए ।

शुक्रबार विहानको खाना खाइसकेपछि दुवैजना सँगै बसिरहेका थिए ।

‘घटना हुनु अगाडिसम्म कोमलले पूर्णबहादुरको टाउकोको जुम्रा हेरिरहेका थिए भन्ने बुझिएको छ,’ कारागार सुरक्षा कार्यालयका एक प्रहरी कर्मचारीले खबरहबसँग भने, ‘पछि सामान्य विवाद हुँदा कोममले सिमेन्टको ब्लकले पूर्णबहादुरको टाउकोमा हिर्काएका रहेछन् । सिमेन्टको ब्लकले लागेर उनको मृत्यु भएको छ ।’