काठमाडौं– साढे ३३ किलोसहितको ३८ क्विन्टल सुन तस्करी र मोरङ उर्लाबारीका सनम शाक्य हत्या प्रकरणमा तानिएका न्यायाधीश उमेश कुमार सिंहलाई सेवाबाट पदमुक्त गरिएको छ ।

सोमबार साँझ बसेको न्याय परिषदको बैठकले उच्च अदालत विराटनगरका न्यायाधीश सिंहलाई सेवाबाट बर्खास्त गर्ने निर्णय गरेको हो ।

प्रधानन्यायाधीश चोलेन्द्र शम्शेर राणाको अध्यक्षतामा बसेको बैठकले उच्च अदालत विराटनगरकै न्यायाधीशहरु थीरबहादुर कार्की र साधुराम सापकोटाको २ वर्षका लागि बढुवा रोक्का गर्ने निर्णय गरेको छ ।

कार्यसम्पादन प्रक्रिया चित्त बुझ्दो नभएको कारण देखाउँदै परिषदको बैठकले कार्की र सापकोटाको बढुवा प्रक्रिया २ वर्षसम्मका लागि रोक्का गर्ने निर्णय गरेको हो ।

उच्च अदालतका न्यायाधीशहरु कार्की र सिंहलाई गम्भीर प्रकृतिको कार्यमा संलग्न भएको भन्दै परिषदले स्पष्टीकरण सोधेको थियो । सिंहको स्पष्टीकरण चित्तबुझ्दो नदेखिएपछि उनलाई सेवाबाट बर्खास्त गर्ने निर्णय भएको परिषद स्रोतले जानकारी दियो ।

विराटनगर उच्च अदालतका ८ जना न्यायाधीश मोरङ उर्लाबारीका सनम शाक्य हत्या र ३८ क्विन्टल सुन तस्करी प्रकरणमा मुछिएका थिए । जसमध्ये ५ जना न्यायाधीशले भने यसअघि नै परिषदबाट सफाइ पाइसकेका थिए ।

परिषदले उच्च अदालत विरटानगरका मुख्य न्यायाधीश कुलरत्न भुर्तेल तथा न्यायाधीशहरु सारंगा सुवेदी, जनक पाण्डे, उमेशराज पौडेल र नागेन्द्र लाभ कर्णविरुद्धको उजुरी तामेलीमा राख्ने निर्णय गरेको थियो ।