काठमाडौं– ललितपुरको सानेपामा आइतबार अपराह्न भएको दुर्घटनामा दुई जनाको मृत्यु भएको छ ।  तीन वटा जीप र एक मोटरसाइकल एक–आपसमा ठोक्किँदा मोटरसाइकलमा दुई जनाको मृत्यु भएको प्रहरीले जानकारी दिएको हो ।

दुर्घटनामा ज्यान गुमाउनेमा मोटरसाइकलमा सवार नेपाल कृषि पत्रकार प्रतिष्ठानका अध्यक्ष गोविन्दप्रसाद शर्मा घिमिरे र नुवाकोटका २८ वर्षका चन्द्रमणि मदुहारीको रहेको प्रहरीले जनाएको छ । दुर्घटनामा घाइते भएको उनीहरुलाई तत्काल उपचारका लागि नर्भिक अस्पताल लगिएको थियो । अस्पतालमा उनीहरु दुवै जनालाई मृत घोषित गरिएको थियो ।

दुर्घटनाका प्रत्यक्षदर्शीका अनुसार स्कार्पियोले टाटा सुमोलाई बाँयाबाट अनियन्त्रित रुपमा उछिनेर जाँदा दायाँ साइटमा पुगेर मोटरसाइकललाई ठक्कर दिएको थियो। मोटरसाइकल कल‌ंकी साइटबाट आउँदै गरेको थियो । सुमोले पनि देब्रे साइटबाट ओभरटेक गर्न खोज्दा अनियन्त्रित भइ दाइने साइटमा पुग्दा हाइलक्समा ठोक्किन पुगी दुर्घटना भएको थियो ।