काठमाडौं – प्रधानमन्त्री कप एकदिवसीय क्रिकेट प्रतियोगिता (पीएम कप क्रिकेट) मा विभागिय टोली नेपाल पुलिस क्लब सेमिफाइनलमा प्रवेश गरेको छ ।
आइतबार कीर्तिपुरस्थित त्रिवि क्रिकेट मैदानमा भएको समूह चरणको अन्तिम खेलमा प्रदेश २ लाई १५६ रनले पराजित गर्दै पुलिस समूह ‘बी’ बाट सेमिफाइनलमा पुगेको हो ।
टस जितेर पहलिो ब्याटिङ गरेको पुलिसले दिएको २५४ रनको फराकिलो लक्ष्य पछ्याएको प्रदेश नम्बर २ २९ ओभरमा सबै विकेट गुमाएर ९७ रन मात्रै बनाउन सक्यो ।
प्रदेश २ का लागि हरि शंकर साहले २९ रन जोड्दा कप्तान मेहबुब आलमले २१ रन बनाए । यस्तै रबी साहले १५ रन जोड्दा सुरज पटेलले १२ रन बनाए । प्रदेश २ लाई सस्तैमा पुलिसका दीपेन्द्रसिंह ऐरीले १० ओभरमा १ मेडनसहित २८ रन खर्चिए ५ विकेट लिए ।
ललित नारायण राजवंशीले ३ विकेट लिए । यसअघि टस जितेर पहिले ब्याटिङ गरेको पुलिसले ५० ओभरमा ९ विकेट गुमाएर २ सय ५३ रन बनाएको थियो । पुलिसका लागि अमित श्रेष्ठले ५० रनको अर्धशतकीय इनिङ्स खेले । यस्तै, सुनिल धमलाले ४३, अनिल कुमार साहले ३७, कुशल भुर्तेलले ३५ तथा आरिफ शेखले ३२ रन बनाए ।
प्रदेश २ का संसद शेखले ४ तथा राशिद खानले २ विकेट लिए । यो जितसंगै पुलिस समूह बीको विजेता बन्दै सेमिफाइनलमा पुगेको छ । समूह चरणमा अपराजित रहेको पुलिसले ४ खेलमा ४ जितसहित ८ अंक जोड्यो । यस्तै, समूह बी मा आर्मी उपविजेता बन्दै सेमिफाइनलमा पुग्यो । आर्मीले ४ खेलमध्ये ३ मा जीत र एक खेलमा हार व्यहोर्दा ६ अंक जोड्यो ।
प्रतिक्रिया