काठमाडौं- नेपाली कांग्रेसका सभापति शेरबहादुर देउवाले पार्टीभित्र अनुशासन र आन्तरिक लोकतन्त्रिक अभ्यासलाई स्वाभाविक रुपमा लिने संस्कारको विकास हुनुपर्ने बताएका छन् ।

कांग्रेस पार्टी कार्यालय सानेपामा नीति, अनुसन्धान तथा प्रशिक्षण प्रतिष्ठानका नवनियुक्त सदस्यहरुको सपथ ग्रहण कार्यक्रममा सभापति देउवाले पार्टीलाई बलियो बनाउनका लागी पार्टीभित्र अनुशासन र आन्तरिक लोकतन्त्रिक अभ्यासलाई ग्रहण गर्नुपर्ने बताए ।

लोकतान्त्रिक पार्टीमा केन्द्रदेखि बडातहसम्म पार्टाीभित्र चुनावी प्रतिस्पर्धा हुनु स्वभाविक भएपनि चुनावमा हारजित भएपछि हार्ने र जित्नेबीच बोलचाल हुने संस्कार पार्टीभित्र रहेको भन्दै देउवाले यस्तो संस्कारले पार्टी संगठन बलियो नहुने बताए ।

अनुशासनहिन कार्य गर्नेमाथि अनुशासन समितिले छानविन गरी कारबाही गर्न सक्ने भएपनि त्यो कारबाहीले मात्रै नपुग्ने देउवाको भनाइ छ । उनले अहिलेको अवस्थामा पार्टी केबल पार्टीको रुपमा रहेको भन्दै पार्टी बनाउन संस्कारको विकास जरुरी भएको पनि बताए । देउवाले आन्तरिक चुनावमा हुने वैमनश्यता न्यूनीकरण गर्ने र अहिले देखिएको समस्या समाधान गर्ने भन्ने तर्फ आफ्नो ध्यान केन्द्रित गर्न नीति तथा प्रतिष्ठानका सदस्यहरुलाई निर्देशन दिए ।

लामो समयदेखि पार्टीको भातृ संगठन नेपाल विद्यार्थी संघको नेतृत्व चयन हुन नसकेको अवस्थामा त्यसको जिम्मेवारी लिएर बसेका सभापति देउवाले नेविसंघको संगठन स्कूल र कलेजहरुमै नभएपछि संगठन बलियो नहुने पनि बताए ।

कांग्रेस महासमिति बैठकपछि केन्द्रीय समितिबाट पारित पार्टी विधान नेपालका सबै पार्टीको भन्दा उत्कृष्ट र समावेशी प्रकृतिको बनाएको बताउँदै सभापति देउवाले यसरी सबैले आफ्नो स्थान पाए बमोजिम संगठनमा सदस्यताको वितरणमा पनि बृद्धि गराउन जोड दिए ।