भारतमा कुनै हलिउड फिल्मका लागि लिएर यति धेरै क्रेज यसअघि देखिएको थिएन तर जब फिल्म ‘एभेन्जर्सः इन्ड गेम’ रिलिज भयो, उक्त फिल्मले भारतीय सिनेमाका सबै मापदण्ड र मानकलाई तोडिदियो ।

यो फिल्मले भारतमा मात्र होइन, विश्वभर नै आफ्नो क्रेज जमाएको छ । नेपालमा पनि फिल्मले निकै नै उत्साहित व्यापार गरेको थियो । यद्यपि यो फिल्मको क्रेज मल्टिप्लेक्स फिल्म हेर्ने दर्शकमाझ बढी देखिएको छ नेपालमा ।

दुनियाँभरमा मार्भलको यो फिल्मले जति कमाइ गरेको छ, त्यसको आफ्नै किसिमको चर्चा छ, अर्कातिर फिल्मले पनि दर्शकमा अनौठो क्रेज बनाएको छ । भारतका दर्शकले यसअघि बलिउड फिल्म बढी हेर्ने र हलिउड फिल्म केही कम हेर्ने गर्थे तर यो फिल्मले भारतीय दर्शकमाझ एउटा गज्जबको क्रेज पैदा गरिदिएको छ ।

योसँगै प्रश्न उठेको छ कि, साइन्स फिक्सन फिल्म र सुपरहिरो फिल्मका पनि आफ्नै वर्ग र दर्शक हुन्छन् ।

त्यसो त बलिउडमा पनि यस्ता खालका फिल्म बन्ने प्रयास नभएका होइनन् । जस्तो कि, कृश, फ्लाइङ जट्ट, सुपर सिंह पनि यस्तै खाले कथामा थिए । हलिउडमा पनि मार्भल फिल्मसँग टक्कर लिनलाई डीसी युनिभर्सले सुपरम्यान, वन्डर वुमेन, ब्याटम्यान जस्ता फिल्म बनाएको छ । तर, मार्भलका फिल्ममा केही त्यस्ता कुरा छन्, जसले दर्शकलाई आफूतिर तान्छन् ।

बलिउडलाई यतिबेला यसको चिन्ता लागिरहेको छ । अर्कातिर यो फिल्मलाई भारतीयहरुले हलिउडको ‘बाहुबली’ भनेर तुलना गरिरहेका छन् । यो फिल्मले भारतमा पनि आक्रामक व्यापार गरेको छ । ‘बाहुबली २’ हेर्ने भारतीय दर्शकको जुन क्रेज थियो, त्यस्तै क्रेज ‘एभेन्जर्सः इन्ड गेम’ को पनि देखिएको छ ।

‘बाहुबली २’ ले पहिलो विकेन्डमा ५ सय ३४ करोडको व्यापार गरेको थियो भने बक्स अफिसमा १६०० करोडभन्दा बढीको विश्वव्यापी कलेक्सन गरेको थियो । ‘एभेन्जर्सः इन्डगेम’ ले पहिलो विकेन्डमा १ सय ५७ करोडभन्दा बढी कमाइ गरेको छ । यो फिल्मको व्यापार अहिले पनि आक्रामक छ ।