धनगढी– बारा र पर्साका आँधी–हुरी पीडितलाई सुदूरपश्चिम प्रदेश सरकारले १ करोड सहयोग उपलब्ध गराउने भएको छ ।

मंगलबार बसेको प्रदेश मन्त्रिपरिषदको वैठकले आँधी–हुरी पीडितलाई १ करोड रुपैयाँ उपलब्ध गराउने निर्णय गरेको हो ।

आँधी–हुरी पीडितको राहात, उद्दार तथा पुनस्र्थापनाका लागि भनेर सुदूरपश्चिम प्रदेश सरकारले १ करोड रुपैयाँ सहयोग गर्ने निर्णय गरेको हो ।

सुदूरपश्चिम प्रदेश सरकारका आन्तरिक मामिला तथा कानूनमन्त्री प्रकाशबहादुर शाहका अनुसार १ करोड सहयोग रकम प्रदेश नम्बर २ सरकारले स्थापना गरेको मुख्यमन्त्री राहत कोषमा जम्मा गरिने छ ।

आइतवार आएको आँधी–हुरीबाट बारा र पर्सा जिल्लामा गरी २९ जनाको मृत्यु भएको छ । आँधी–हुरीबाट करिब ७ सय जना घाइते भएकोमा २ सय ५० भन्दा बढीको अहिले पनि उपचार चलिरहेको छ ।

यसअघि ३ नम्बर प्रदेश सरकारले पनि आँधी–हुरी प्रभावितका लागि १ करोड रुपैयाँ सहयोग उपलब्ध गराउने निर्णय गरेको थियो ।