एजेन्सी – पाकिस्तानबाट मुक्त भइ स्वदेश फर्किएका भारतीय वायुसेनाका विङ्ग‌ कमाण्डरको नयाँ भिडियो सार्वजनिक भएको छ । भिडियोमा पाकिस्तानी सेनाको हिरासतबाट हालै मुक्त भएर भारत फर्केका भारतीय वायुसेनाका विङ्ग‌ कमाण्डर अभिनन्दन वर्तमानले पाकिस्तानी सेना आफूसँग व्यावसायिक रूपमा प्रस्तुत भएको जनाएका छन् ।
भारतीय वायुसेनाको वर्दी लगाएर भिडियोमा प्रस्तुत भएका विङ्ग कमाण्डर अभिनन्दनले पाकिस्तानी सेनाको व्यवहारबाट आफू प्रभावित भएको समेत बताएका छन् ।
सेतो भित्ताको आडमा खिचिएको भिडियो भारी मात्रामा सम्पादन गरिएको छ ।
“मैले पाकिस्तानी सेनासँग केही समय बिताएको छु, म पाकिस्तानी सेनाको व्यवहारबाट प्रभावित छु ।” भिडियोमा अभिनन्दनले भनेका छन् ।
गत बुधबार उनले उडाइरहेको भारतीय वायुसेनाको मिग २१ लडाकु विमान पाकिस्तानी सेनाले खसालेपछि उनी पाकिस्तानी सेनाको हिरासतमा थिए ।
पछि पाकिस्तानी प्रधानमन्त्री इमरान खानले भारतलाई शान्तिको सन्देश दिन उनलाई भारत फिर्ता गर्ने घोषणा गरेका थिए । प्रधानमन्त्री खानको घोषणा अनुसार शुक्रबार बेलुकी उनी भारत-पाकिस्तान सीमाको वाघा-अटारी नाका हुँदै भारत प्रवेश गरेका थिए । उनलाई ठूलो संख्यामा भेला भएका भारतीय नागरिक तथा भारतीय सेनाका अधिकारीले सीमाक्षेत्रमा स्वागत गरेका थिए ।