काठमाडौं– प्रतिनिधिसभाको शुक्रवारको वैठक शोक प्रस्ताव पारित गर्दै स्थगित भएको छ ।

संस्कृति पर्यटन तथा नागरिक उड्डयनमन्त्री रवीन्द्र प्रसाद अधिकारीको निधनप्रति शोक प्रस्ताव पारित गर्दै शुक्रवारको वैठक स्थगित भएको हो ।

शुक्रवार दिउँसो ३ बजे शुरु भएको वैठकमा सभामु कृष्ण बहादुर महराले शोक प्रस्ताव पेश गरेका थिए ।

शोक प्रस्ताव पारित भएपछि संसद वैठकमा उपस्थित सबै सांसदले दिवंगत अधिकारीको चिर शान्तीको कामना गर्दै एक मिनेट उठेर मौन धारण गरेका थिए ।

यससँगै सभामुख महराले अर्को वैठक फागुन १८ गते शनिवार दिनको १ बजे बस्ने गरी शुक्रबारको वैठक स्थगित भएको जनाए ।

यसअघि बिहीवार बस्ने भनिएको वैठक मन्त्री अधिकारीसहित ७ जनाको निधन हुने गरी भएको हेलिकोप्टर दुर्घटनाका कारण शुक्रवार बस्ने गरी सूचना टाँस गरी स्थगित गरिएको थियो ।

अधिकारी २०६४ र २०७० सालको संविधानसभा र २०७४ सालको प्रतिनिधिसभा निर्वाचनमा कास्की क्षेत्र नम्बर २ बाट प्रत्यक्ष निर्वाचित भएका थिए ।