काठमाडौं–ज्यूँदो बाबुलाई मरेको भन्दै किर्ते गरेर नेपाली नागरिकता लिएका भारतीय नागरिक पक्राउ परेका छन् । भारत विहार अररियाका शम्भुप्रसाद साहले नागरिकताअभिलेखमै नभएका व्यक्तिको नाम किर्ते गरी आवश्यक कागजपत्र बनाई जिल्ला प्रशासन कार्यालय मोरङबाट नागरिकता लिएको अन्नपूर्ण पोस्टमा खबर छ ।

त्यस्तै ‘बाबा आउने बाटो हेर्दै रवीन्द्रका छोरा’ शीर्षकमा रवीन्द्र अधिकारीका छोरा स्वराज अधिकारी घरको बार्दलीमा बसेर बाबा आउने बाटो नियाल्दै गरेको तस्वीरसहितको समाचार छापेको छ । दिनभर घरमा शुभेच्छुकको भीड लागिरहँदा स्वराज भने बार्दलीमा बसेर बाबा आउने बाटोतर्फ हेरिरहेका थिए ।

त्यस्तै पञ्चेश्वरमा विवाद शीर्षकको समाचारमा डेढ वर्षपछि बसेको पञ्चेश्वर बहुउद्देश्यीय आयोजनाको विस्तुत परियोजना तयार पार्ने विषयमा छलफल गर्न बसेको नेपाल भारतका अधिकारीबीचको वार्ता विफल भएको छ । परियोजनाका मिल्न बाँकी १३० विषय यो वार्ताबाट पनि टुंगिन सकेन ।