लमजुङ- मर्स्याङ्दी गाउँपालिका–६ दिङदिङका ३६ वर्षीया मिर्गौला पीडित मीनमाया गुरुङको उपचारका लागि ९ लाख तीन हजार सहयोग सङ्कलन गरिएको छ ।

गाउँपालिकास्थित युनाइटेड बाघेता र योङ स्टार युवा क्बलको अगुवाइमा स्थानीय र विदेशमा रहेका नेपालीबाट सो रकम सङ्कलन गरिएको हो ।

आज (मंगलबार) बेँसीशहरमा आयोजित कार्यक्रममा मिर्गौला पीडितका श्रीमान् कामसार्की गुरुङलाई सो रकम हस्तान्तरण गरिएको हो ।

अमेरिकाबाट एक लाख ३० हजार, लमजुङ उत्तरी भेग तमु समाज काठमाडौँले एक लाख ८० हजार र लमजुङ आमा समूहले तीन लाख २४ हजार सहयोग गरेको बाघेता युवा क्लबका अध्यक्ष विष्णु गुरुङले जानकारी दिए ।

हालसम्म पाँच लाखभन्दा बढी खर्च भएको पीडितका श्रीमान् कामसाकीले जानकारी दिए । गुरुङ सात महिनाअघि बिरामी भएकी थिइन । उनले गण्डकी अस्पतालमा डायलासिस गराउँदै आएकी छन् ।

मिर्गौला प्रत्यारोपणका लागि ८० लाखभन्दा बढी खर्च लाग्ने बताइएको छ ।