देहरादून– उत्तराखण्डको अउली नगरमा भएको भव्य वैवाहिक कार्यक्रममा थुप्रिएको करिब तीन सय क्विन्टल फोहोर विसर्जन गरिएको छ ।

स्थानीय अधिकारी अनुसार दक्षिण अफ्रिकाका एक व्यापारीका दुई छोराहरुको विवाहका कारण त्यस्तो फोहोर थुप्रिएको थियो । स्थानीय सफाई कर्मचारीले बिहेका कारण दुर्गन्धित भएको क्षेत्रमा पूर्ण रुपमा सफाई गरिएको जनाएका छन् । दक्षिण अफ्रिकाका गुप्ता परिवारका दुई छोराको विवाह समारोह गत जुन १८ देखि २२ सम्म भएको थियो ।

फोहोर विसर्जनका लागि गुप्ता परिवारले ५४ हजार भारतीय रुपैयाँ नगर प्रशासनलाई दिएको भारतीय सञ्चारमाध्यमले जनाएका छन् । नगर प्रशासनले विभिन्न स्थानमा छरिएको फोहोर सफा गर्न २० जना सफाई कर्मचारी खटाएको जनाएको छ । त्यस्तै, उत्तराखण्ड उच्च अदालतले एक आदेश जारी गर्दै जिल्ला प्रशासनलाई फोहोरका कारण उत्पन्न समस्याबारे प्रतिवेदन बुझाउन भनेको छ ।

अत्यन्त भव्य विवाह समारोहमा करिब २ अर्ब रुपैयाँ खर्च भएको गुप्ता परिवारले जनाएको छ । विवाह समारोहमा उच्चपदस्थ भारतीय राजनीतिक नेताहरु, मुख्य मन्त्री, नायिका कट्रिना कैफ, योग गुरु बाबा रामदेव समेतका पाहुनाहरु सहभागी थिए ।

विवाह कार्यक्रमकै अवसरमा रामदेवले दुई घण्टे योग शिविर सञ्चालन गरेका थिए । विवाहमा सहभागी हुने अतिथिहरुका लागि हेलिकप्टरको समेत व्यवस्था गरिएको थियो । विवाहमा धेरै फोहोर भएको भन्दै गुप्ता परिवारलाई स्थानीय प्रशासनले डेढ लाख भारतीय रुपैयाँ जरिवान तिराएको छ ।